Programmini inuppassuarnit atorneqartuni - ass. Adobe Readerimi Javamilu isumannaallisaanermi sanngiiffiit pinerluttunit ilaannikkut paasineqartarput. Systemini aqutsissutini soorlu Windowsini, iOS-imi Androidimilu sanngiiffeqartarpoq.
Isumannaallisaanermi sanngiiffik paasineqaraangat - ass. nioqqutissiortoq Adobe Microsoftiluunniit sanngiiffik iluarsiniarlugu nutarterisarput. Nutarterinngikkuit pisoqaanerusorlu pigiinnarukku pinerluttut isumannaallisaanermi sanngiiffiit atorlugit qarasaasiannut iserniarsarisinnaapput.
Isumannaallisaanermi sanngiiffiit peerniarlugit aamma qarasaasiavit, mobiilibit tabletivillu isumannaatsuunissaat anguniarlugit ingerlaavartumik nutarterisoqartarpoq.
Programmit tamaasa nutartikkit
Systemimi aqutsissutinni programminnilu assigiinngitsuni nutarterinermi nutaanerpaat atorlugit nutarteriguit taava isumannaatsuussaatit. “Automatisk opdatering” tuussagit innersuussutigaarput. Taava puiussanngilat.
Programmit ilaat nutarterniarlugit nammineerlutit iliuuseqassaatit. Assersuutigalugu skærminni nalunaarutisiguit programmip nutarternissaanut OK toorlugu akuersisinnaavutit. Nutarterinissannik qinnuigineqaruit tamatigut nutarterisarnissat eqqaamassavat.
Programmit piikkit
Programmit atorunnaakkavit peertarnissaat tamatigut iluaqutaasarpoq. Taava nutarternissaat eqqarsaatigisariaqassanngilatit.
Antivirus aamma firewall
Antivirusprogrammip automatiskimik nutartertarnissaa, firewalleqarnissat antispyprogrammeqarnissallu innersuussutigaarput. Programmit pingasut pigigukkit qarasaasiat saassussinernut programminullu ajoqutaasunut illersorneqassaaq.